An scéala is déanaí

An 6 Feabhra chláraigh an Coimisiún tionscnamh Eorpach ó na saoránaigh dar teideal ‘European Cannabis Initiative’.

Iarrann na heagraithe ar an gCoimisiún an méid seo a leanas a dhéanamh: comhthionól saoránach tras-Eorpach a ghairm maidir le beartais cannabais, agus smachtbhannaí agus comhsheasmhacht bheartais na mBallstát san áireamh; (ii) rochtain ar channabas míochaine a chothú agus cead a thabhairt cannabas agus a dhíorthaigh atá forordaithe chun críoch teiripeach a iompar chun a chinntiú go mbainfear leas iomlán as an gceart chun sláinte agus (iii) na hacmhainní is gá a leithdháileadh chun taighde a dhéanamh ar channabas maidir lena úsáidí teiripeacha. 

Is é conclúid an Choimisiúin nach féidir an tionscnamh a chlárú ach amháin maidir leis an dara agus an tríú cuspóir, toisc nach gcomhlíonann ach na cuspóirí sin na ceanglais maidir le clárú. Bhí ar an gCoimisiún diúltú do chéad chuspóir an tionscnaimh a chlárú toisc nach dtagann sé faoi chumhachtaí an Choimisiúin togra a chur isteach le haghaidh gníomh dlí den Aontas.

Lean an clárú páirteach nós imeachta dhá chéim inar iarradh ar na heagraithe, mar chéim thosaigh, a dtionscnamh tosaigh a leasú, agus an chéad mheasúnú ón gCoimisiún á chur san áireamh. 

Tá sé mhí ag na heagraithe chun bailiúchán na sínithe a oscailt. 

Is féidir le saoránaigh na Polainne eID (Profil Zaufany/mObywatel) chun tacú le tionscnaimh Eorpacha ó na saoránaigh sa Lárchóras bailithe ar líne. Is í an Pholainn an 18ú tír san Aontas a bhfuil úsáid chóras náisiúnta eID á chur i bhfeidhm aici chun tionscnaimh Eorpacha ó na saoránaigh a shíniú. Féach leat an stádas le haghaidh gach tír den Aontas. 

Chinn an Coimisiún Eorpach dhá thionscnamh Eorpacha ó na saoránaigh a chlárú an 24 Eanáir.

Leis an tionscnamh ‘Déantar cleachtais tiontúcháin a chosc san Aontas Eorpach’, iarrtar go gcuirfear cosc ar idirghabhálacha atá dírithe ar ghnéaschlaonadh, féiniúlacht inscne agus/nó léiriú inscne saoránach LGBTIQ+ a athrú, a chur faoi chois nó a bhrúigh faoi chois.

Leis an tionscnamh ‘Tionscnamh Eorpach ó na saoránaigh chun an Talmhaíocht agus Geilleagar na Tuaithe a Chosaint san Eoraip’, iarrtar go ndéanfar talmhaíocht agus geilleagar tuaithe na hEorpa a chosaint trí chreat rialála atá bunaithe ar roinnt gnéithe lena n-áirítear úsáid tosaíochta talún talmhaíochta le haghaidh táirgeadh bia, biafhlaitheas a ráthú agus aghaidh a thabhairt ar shaincheisteanna biashlabhra agus ar phraghsanna arda. 

Tá sé mhí anois ag na heagraithe an t-am a roghnú a chuirfidh siad tús le bailiú na tacaíochta.

Cuireadh tús le vótáil phoiblí an chomórtais físeán ‘ImagineEU’ an 20 Nollaig. Iarradh ar dhaltaí sa dá bhliain dheireanacha den mheánscoil a gcuid smaointe nithiúla a chur i láthair i bhfíseán gearr a d’fhéadfadh dul chun tairbhe do shaoránaigh ar fud an Aontais Eorpaigh – ar an gcaoi chéanna leis an Tionscnamh Eorpach ó na Saoránaigh. 

Is féidir leat féachaint anois ar na físeáin a d’ullmhaigh na daltaí agus vóta a chaitheamh do na cinn is fearr leat – is féidir leat vóta a chaitheamh don oiread físeán agus is mian leat – go dtí an 28 Eanáir 2024.

D’fhoilsigh an Coimisiún Eorpach a fhreagra ar an tionscnamh Eorpach ó na saoránaigh ‘An Eoraip Saor ó Fhionnadh’, an deichiú tionscnamh ar éirigh leis agus ar thacaigh bhreis agus 1 mhilliún saoránach ar fud an Aontais leis. Bhailigh an tionscnamh os cionn 1.5 milliún síniú bailí agus baineadh amach na tairseacha ba ghá i 18 mBallstát.

Léigh an teachtaireacht ón gCoimisiún.

Ghlac an Coimisiún inniu a chéad tuarascáil ar chur chun feidhme an Rialacháin athbhreithnithe maidir leis an Tionscnamh Eorpach ó na Saoránaigh. Cuirtear i láthair sa tuarascáil an dul chun cinn a rinneadh ó rinneadh athbhreithniú 2020 ar an rialachán agus fógraítear inti tacar de bhearta praiticiúla arb é is aidhm dóibh tuilleadh feabhais a chur ar fheidhmiú an Tionscnaimh Eorpaigh ó na Saoránaigh agus ar rannpháirtíocht shaoránaigh na hEorpa i bpróisis dhaonlathacha an Aontais. Féach an leathanach gréasáin tiomnaithe agus na príomhfhíricí agus na príomhfhigiúirí don tréimhse tuairiscithe.

Tá leagan nua den Lárchóras Bailithe ar Líne, rud a mbaineann TESanna aonair úsáid as chun tacaíocht a bhailiú ar líne, ar fáil anois. D’fhéadfadh úsáideoirí feabhsuithe a thabhairt faoi deara maidir leis an gcuma atá air agus leis an dóigh a bhfeidhmíonn sé, mar shampla, léarscáil fheabhsaithe na hEorpa agus eolas faoi líon na dtacadóirí in aghaidh na tíre. Ós rud é go bhfuil tóir níos mó ann ar thacaíocht trí úsáid a bhaint as ríomhaitheantas (eID), is féidir leis na húsáideoirí a fheiceáil anois go héasca cén scéim ríomhaitheantais náisiúnta atá ar fáil dóibh.

On Thursday, 23 November, at 12.30 CET, the ECI Forum will host a webinar ‘What is the ECI and Why Should I Care?’. This webinar will focus on the process of the ECI, the support tools available to organisers and testimonials from two organisers of successful initiatives.

An 8 Samhain 2023, chláraigh an Coimisiún ceithre thionscnamh Eorpacha ó na saoránaigh, dar teideal: ‘Eolas Fíor-ama ag Stadanna Bus an Aontais Eorpaigh’, ‘Iontaoibh agus Saoirse’, “Is Eorpach mé” agus ‘Údarás Eorpach Comhshaoil a Chruthú’.

Leis an tionscnamh ‘Eolas Fíor-ama ag Stadanna Bus an Aontais Eorpaigh’, iarrtar go ndéanfaí cóid QR a chomhtháthú ag stadanna bus ar fud Bhallstáit an Aontais chun go mbeidh paisinéirí in ann rochtain a fháil ar eolas fíor-ama.

Leis an tionscnamh ‘Iontaoibh agus Saoirse’, iarrtar bearta maidir le toiliú eolasach, dínit an duine, saoirse agus neamhspleáchas coirp. Tagraíonn sé go háirithe don cheart chun cinntí eolasacha a dhéanamh maidir le roghanna cúraim sláinte agus cóireála.

 Is é is aidhm don tionscnamh ‘“Is Eorpach mé”: tionscnamh Eorpach ó na saoránaigh chun do Shaoránacht Náisiúnta agus Eorpach a Nascadh le chéile’ an ceart chun oideachais a thabhairt isteach maidir le saoránacht Eorpach, cearta an duine, an daonlathas agus an smacht reachta, agus tacú leis an méid sin trí shraith ceanglas.

Leis an tionscnamh ‘Údarás Eorpach Comhshaoil a Chruthú’, iarrtar go mbunófaí Údarás Eorpach Comhshaoil, a mbeidh sé de chumhacht aige cinntí riaracháin ceangailteacha a eisiúint, monatóireacht a dhéanamh ar ghníomhaíochtaí a bhfuil tionchar acu ar an gcomhshaol agus smachtbhannaí a eisiúint maidir le truailliú an chomhshaoil.

Leis na 4 thionscnamh nua sin, méadaíonn líon na dtionscnamh a cláraíodh in 2023 go 11. Tá sé mhí ag eagraithe na dtionscnamh anois chun an t-am a roghnú a chuirfidh siad tús le bailiú na tacaíochta.

Tá an comórtas físeán ‘ImagineEU’ do dhaltaí meánscoile ar oscailt anois! Tugaimid cuireadh do dhaltaí (atá sa dá bhliain dheireanacha den mheánoideachas) ó gach cearn den Aontas Eorpach físeáin ghearra a chruthú agus a chomhroinnt faoina smaointe maidir le feabhsuithe nithiúla a d’fhéadfaí a dhéanamh san Aontas, ag tógáil ar choincheap an Tionscnaimh Eorpaigh ó na Saoránaigh.   

Faigh amach faoi rialacha an chomórtais agus cuir isteach d’iarratas faoin 13 Nollaig 2023. Tabharfaidh trí fhoireann bhuacha cuairt staidéir dhá lá ar institiúidí an Aontais Eorpaigh sa Bhruiséil.