L-aħħar aħbarijiet

Fis-17 ta’ Settembru, il-Kummissjoni Ewropea ppubblikat sejħa għal evidenza dwar l-ittestjar fuq l-annimali fil-valutazzjonijiet tas-sikurezza kimika u l-pjan direzzjonali tal-Kummissjoni biex dan jitneħħa gradwalment.

L-iżvilupp ta’ pjan direzzjonali bħal dan hu wieħed mill-impenji li għamlet il-Kummissjoni Ewropea bi tweġiba għall-Inizjattiva taċ-Ċittadini Ewropej “Nippreservaw il-Kożmetiċi li ma Jinvolvux Krudeltà – Nimpenjaw Ruħna għal Ewropa Mingħajr l-Ittestjar fuq l-Annimali”. Il-pjan direzzjonali għandu jinkludi stadji importanti u azzjonijiet speċifiċi biex ikompli jitnaqqas l-ittestjar fuq l-annimali u fl-aħħar mill-aħħar it-tranżizzjoni lejn sistema regolatorja ħielsa mill-annimali skont biċċiet rilevanti ta’ leġiżlazzjoni dwar is-sustanzi kimiċi.

Is-sejħa għal evidenza għandha l-għan li tfittex għarfien espert dwar l-ittestjar li ma jsirx fuq l-annimali fil-valutazzjonijiet tas-sikurezza kimika u b’mod partikolari sottomissjonijiet li jissintetizzaw l-istat attwali tal-għarfien fl-oqsma rilevanti. Barra minn hekk, il-komunikazzjoni mal-partijiet ikkonċernati tkompli permezz ta’ sensiela ta’ sessjonijiet ta’ ħidma (f’Diċembru 2023, Ottubru 2024 u Mejju 2025).

Fl-24 ta’ Settembru l-Kummissjoni Ewropea ddeċidiet li tirreġistra żewġ inizjattivi taċ-ċittadini Ewropej.

L-għanijiet tal-“IĊE għal Ewropa Intelliġenti u Reżiljenti fl-Ilma” jinkludu: pjan ta’ azzjoni għall-ilma; elevazzjoni tar-reżiljenza tal-ilma għall-istess prijorità bħad-dekarbonizzazzjoni; bidla lejn industrija u agrikoltura effiċjenti fl-użu tal-ilma; l-iżgurar tal-ħiliet it-tajba għal ekonomija intelliġenti fl-użu tal-ilma u d-dritt għal ilma nadif u sikur u sanità.

L-organizzaturi tal-inizjattiva “PsychedeliCare” jappellaw lill-Kummissjoni biex tappoġġja l-kunsens espert dwar l-istandards tal-kura psikedelika u l-introduzzjoni ta’ terapiji psikedeliċi. L-inizjattiva tħeġġeġ ukoll lill-Kummissjoni tagħti spinta lir-riċerka dwar l-applikazzjonijiet terapewtiċi tal-pingchedelics u l-iżvilupp ta’ networks ta’ riċerka.

Dawn l-inizjattivi huma l-għaxar u l-ħdax-il waħda reġistrati fl-2024. Issa, l-organizzaturi għandhom sitt xhur biex jiftħu l-ġbir tal-firem. 

Fl-24 ta’ Lulju l-Kummissjoni Ewropea ddeċidiet li tirreġistra żewġ inizjattivi taċ-ċittadini Ewropej.

L-inizjattiva “Stop Cruelty Stop Slaughter” (“Inwaqqfu l-Moħqrija u t-Tbiċċir”) titlob inċentivi għall-produzzjoni tal-proteini tal-pjanti, inklużi l-ħalib ibbażat fuq il-pjanti u s-sostituti tal-bajd, kif ukoll il-laħam ikkultivat. L-organizzaturi jappellaw ukoll għal tnaqqis fl-għadd tal-annimali tar-razzett u l-għeluq progressiv tal-irziezet kollha tal-annimali.

L-inizjattiva “Stop Fake Food: Origin on Label” (“Inwaqqfu l-ikel Falz: l-Oriġini fuq it-Tikketta”) titlob miżuri li jiżguraw l-aċċess tal-konsumaturi Ewropej għal informazzjoni trasparenti dwar l-ikel li jixtru, kif ukoll tikkettar ċar u espliċitu tal-oriġini għall-prodotti kollha u għall-aderenza mal-istandards ambjentali, tas-saħħa u tax-xogħol fis-suq intern.

Dawn l-inizjattivi huma t-tmien u d-disa’ waħda reġistrati fl-2024. L-organizzaturi issa għandhom sitt xhur biex jiftħu l-ġbir tal-firem. 

Hekk kif bdiet il-leġiżlatura Ewropea 2024-2029 fis-16 ta’ Lulju 2024,l-Anness I tar-Regolament dwar l-IĊE rivedut sar applikabbli. Dan jistabbilixxi numri minimi ġodda ta’ firmatarji għal kull Stat Membru (“limiti”). Dawn il-limiti huma marbuta man-numru ta’ Membri tal-Parlament Ewropew (MEPs). Hekk kif l-għadd ta’ Membri tal-PE żdied minn 705 għal 720 fil-leġiżlatura l-ġdida, il-limiti żdiedu wkoll. Biex IĊE tiġi eżaminata mill-Kummissjoni Ewropea, din trid tiġbor mill-inqas miljun firma valida u tikseb dawn in-numri minimi ta’ firem validi f’mill-inqas seba’ pajjiżi tal-UE. 

Dawn in-numri minimi ġodda japplikaw għall-IĊE reġistrati mill-Kummissjoni fis-16 ta’ Lulju 2024 jew wara. In-numri minimi l-ġodda ma japplikawx għall-Inizjattivi taċ-Ċittadini Ewropej reġistrati qabel s-16 ta’ Lulju 2024 li għalihom għadhom japplikaw il-limiti preċedenti.

Fid-19 ta’ Ġunju l-Kummissjoni Ewropea ddeċidiet li tirreġistra żewġ inizjattivi taċ-ċittadini Ewropej.

L-inizjattiva “Air-Quotas” (Kwoti tal-Ajru) tappella għal mekkaniżmu tal-kwoti tal-karbonju taċ-ċittadini f’kull pajjiż li għandu jħeġġeġ lin-negozji jiddekarbonizzaw permezz tad-domanda tal-konsumaturi. L-organizzaturi jqisu li jenħtieġ li dan ikopri x-xiri kollu ta’ oġġetti u servizzi, u li jibda mit-trasport bl-ajru. 

L-organizzaturi tal-inizjattiva “Stop Destroying Videogames” (Inwaqqfu l-Qerda tal-Logħob tal-Kompjuter) jappellaw għal rekwiżit għall-pubblikaturi ta’ logħob elettroniku fl-UE li jħallu dak il-logħob fi stat funzjonali (b’mod li jista’ jintlagħab), sabiex tiġi evitata d-diżattivazzjonii mill-bogħod tagħhom.

Dawn l-inizjattivi huma s-sitt u s-seba’ waħda rreġistrati fl-2024. L-organizzaturi issa għandhom sitt xhur biex jiftħu l-ġbir tal-firem. 

Fit-13 ta’ Mejju, il-Kummissjoni rreġistrat inizjattiva taċ-ċittadini Ewropej intitolata “Insalvaw il-Pjaneta billi nċaqilqu t-tassazzjoni mix-xogħol għall-emissjonijiet tal-gassijiet serra”. Hi tistieden lill-Kummissjoni ssaħħaħ il-Pakkett “Lesti għall-mira ta’ 55%” u s-sistema tal-ipprezzar tal-karbonju tal-UE u għar-ridistribuzzjoni ta’ parti sostanzjali mid-dħul mill-ipprezzar tal-karbonju lill-unitajiet domestiċi b’introjtu baxx, issaħħaħ il-Fond Soċjali għall-Klima tal-UE u tippromwovi l-istabbiliment ta’ “Klabb għall-Klima” għall-pajjiżi li jixtiequ jadottaw ipprezzar tal-karbonju aktar robust.

Din hi l-ħames inizjattiva rreġistrata fl-2024. L-organizzaturi għandhom sitt xhur biex jiftħu l-ġbir tal-firem. 

Fl-10 ta’ April, il-Kummissjoni rreġistrat inizjattiva taċ-ċittadini Ewropej intitolata “My Voice, My Choice: For Safe And Accessible Abortion” (Il-Vuċi Tiegħi, L-Għażla Tiegħi: Għal Abort Sikur u Aċċessibbli). Din titlob lill-Kummissjoni biex tissottometti proposta għal għal appoġġ finanzjarju lill-Istati Membri sabiex jippermettu terminazzjoni sikura tat-tqala fl-Ewropa għal kull min m’għandux aċċess għal abort sikur u legali.

Din hija r-raba’ inizjattiva rreġistrata fl-2024. L-organizzaturi għandhom sitt xhur biex jiftħu l-ġbir tal-firem. 

Fil-21 ta’ Marzu 2024, ir-rebbieħa tal-kompetizzjoni “ImagineEU” għall-istudenti tal-iskejjel sekondarji ġew onorati waqt ċerimonja tal-għoti tal-premjijiet fil-kwartieri ġenerali tal-Kummissjoni Ewropea fi Brussell. It-tliet timijiet rebbieħa minn Franza, l-Italja u r-Rumanija jipparteċipaw fi żjara ta’ studju ta’ tlett ijiem fl-istituzzjonijiet Ewropej. Il-kompetizzjoni bil-video ImagineEU tibni fuq il-kunċett tal-Inizjattiva taċ-Ċittadini Ewropej u għandha l-għan li tagħti s-setgħa liċ-ċittadini żgħażagħ biex ikollhom rwol attiv fl-influwenzar tal-politiki tal-UE. Hi stiednet studenti ta’ bejn is-16 u t-18-il sena mill-UE kollha biex joħolqu u jaqsmu videos qosra li jippreżentaw l-ideat tagħhom għal bidliet fil-livell Ewropew li jistgħu jtejbu l-kwalità tal-ħajja fil-komunitajiet tagħhom. Ara l-videos rebbieħa.

Fil-21 ta’ Frar u t-12 ta’ Marzu, il-Kummissjoni Ewropea ppubblikat sejħa għal evidenza u konsultazzjoni pubblika. Dawn għandhom l-għan li jfittxu fehmiet u għarfien espert dwar il-konsegwenzi ambjentali, soċjali u ekonomiċi ta’ projbizzjoni potenzjali fuq il-bejgħ fl-UE u l-kummerċ internazzjonali tal-pinen tal-klieb il-baħar separati u l-ġbir ta’ feedback dwar l-għażliet ta’ politika potenzjali biex il-klieb il-baħar u l-ekosistemi tal-baħar relatati jiġu protetti aħjar. 

L-għan hu li jiġi żgurat l-aktar mod infurmat tajjeb, parteċipattiv u trasparenti biex tittieħed deċiżjoni dwar is-segwitu għall-inizjattiva taċ-ċittadini Ewropej “Inwaqqfu t-tneħħija tal-pinen tal-klieb il-baħar — Inwaqqfu l-Kummerċ”. 

Fit-22 ta’ Frar 2024, il-Qorti tal-Ġustizzja tat is-sentenza tagħha fil-kawża C-54/22 P, ir-Rumanija vs il-Kummissjoni. Id-deċiżjoni tal-Kummissjoni tal-2019 li tirreġistra parzjalment l-Inizjattiva taċ-Ċittadini Ewropej (IĊE) “Politika ta’ koeżjoni għall-ugwaljanza tar-reġjuni u s-sostenibbiltà tal-kulturi reġjonali” ġiet ikkonfermata wara ċ-ċaħda tal-appell tar-Rumanija.