Sett ta’ għodod għall-iskejjel “Id-Demokrazija tal-UE fl-Azzjoni - Semma’ Leħnek bl-Inizjattiva taċ-Ċittadini Ewropej”
Xi jġiegħel liż-żgħażagħ jieħdu azzjoni dwar kwistjoni li tinteressahom ħafna? X’azzjonijiet jistgħu jieħdu bħala ċittadini tal-Unjoni Ewropea? X’inhu possibbli meta naħdmu flimkien – u bejn il-fruntieri – fuq kwistjonijiet li huma importanti?
Involvi lill-istudenti tiegħek bis-sett ta’ għodod il-ġdid għall-iskejjel “Id-Demokrazija tal-UE fl-Azzjoni - Semma’ Leħnek bl-Inizjattiva taċ-Ċittadini Ewropej”!
Biex isiru ċittadini attivi, iż-żgħażagħ jeħtieġ li jifhmu kif taħdem id-demokrazija u x’inhuma d-drittijiet u r-responsabbiltajiet tagħhom. Is-sett ta’ għodod “Id-Demokrazija tal-UE fl-Azzjoni” jintroduċi lill-istudenti għall-Inizjattiva taċ-Ċittadini Ewropej u jħeġġiġhom jieħdu rwol attiv fi kwistjonijiet Ewropej. Hu mmirat lejn l-istudenti tal-iskola sekondarja fl-aħħar sentejn tal-iskola tagħhom.
Permezz ta’ istruzzjoni, riċerka, dibattitu, ħidma ta’ proġetti u logħob ta’ rwoli, l-istudenti se jitgħallmu kif jittieħdu d-deċiżjonijiet fl-UE, kif dawn id-deċiżjonijiet jaffettwaw il-ħajja tagħhom ta’ kuljum, u, l-aktar importanti, kif l-Inizjattiva taċ-Ċittadini Ewropej tippermettilhom jingħaqdu ma’ oħrajn biex isawru l-politika tal-UE dwar kwistjonijiet li jinteressawhom.
“L-istudenti tiegħi sabu l-modulu verament interessanti. Il-kompiti qajmu l-kurżità tagħhom u ħadu pjaċir ħafna, speċjalment waqt li kienu qed jagħmlu video għall-IĊE tagħhom - taħlita tajba bejn l-edukazzjoni u d-divertiment (edudivertiment).” - Małgorzata, għalliema tal-iskola sekondarja mill-Polonja
Il-kors huwa adattat għall-klassijiet taċ-ċittadinanza jew tas-suġġett taċ-ċivika; tajjeb ukoll bħala parti minn kors ibbażat fuq proġett, klassi ta’ lingwa barranija, jew CLIL. Hu disponibbli bil-lingwi uffiċjali kollha tal-UE.
L-introduzzjoni tas-sett ta’ għodod
F’Mejju 2023 sar webinar biex jintroduċi s-sett ta’ għodod lill-edukaturi. Hawn taħt issib reġistrazzjoni tal-webinar u s-slides tal-powerpoint (bl-Ingliż biss).
Tista’ wkoll tisma’ l-episodju tal-podcast “CitizenCentral” “The ABCs of ‘EU Democracy in Action’ - presenting a European Citizens’ Initiative Toolkit” (bl-Ingliż biss).
Kompetizzjoni għall-istudenti tal-iskola sekondarja
Bejn is-16 ta’ Ottubru 2023 u t-13 ta’ Diċembru 2023, gruppi ta’ studenti tal-iskola sekondarja huma mistiedna jissottomettu l-entrati tagħhom għall-kompetizzjoni tal-video “ImagineEU”. Il-kompetizzjoni hija bbażata fuq l-Inizjattiva taċ-Ċittadini Ewropej u tikkomplementa s-sett ta’ għodod edukattivi għall-iskejjel “Demokrazija fl-Azzjoni tal-UE - Semma’ Leħnek bl-Inizjattiva taċ-Ċittadini Ewropej”. Il-premju huwa vjaġġ fi grupp fi Brussell għal tliet timijiet rebbieħa.
Aqra aktar fil-paġna tal-kompetizzjoni tal-Video.
