Preżentazzjoni u eżami
L-inizjattiva “End the Cage Age” ġiet sottomessa lill-Kummissjoni fit-2 ta’ Ottubru 2020, wara li ġabret 1,397,113-il dikjarazzjoni ta’ appoġġ. Ara l-istqarrija għall-istampa.
L-organizzaturi ltaqgħu mal-Viċi President tal-Kummissjoni Ewropea għall-Valuri u t-Trasparenza, Věra Jourová u mal-Kummissarju għas-Saħħa u s-Sikurezza Alimentari, Stella Kyriakides fit-30 ta’ Ottubru 2020.
Saret seduta pubblika fil-Parlament Ewropew fil-15 ta’ April 2021. Ara l-istqarrija għall-istampa.
L-inizjattiva ġiet diskussa fis-sessjoni plenarja tal-Parlament Ewropew fl-10 ta’ Ġunju 2021. Fir-riżoluzzjoni adottata fl-istess jum, il-Parlament Ewropew esprima l-appoġġ tiegħu għall-inizjattiva. Ara l-istqarrija għall-istampa tal-Parlament Ewropew.
Fit-30 ta’ Ġunju 2021, il-Kummissjoni adottat Komunikazzjoni li tistabbilixxi l-azzjonijiet li biħsiebha tieħu b’reazzjoni għall-inizzjattiva “End the Cage Age”. Ara l-istqarrija għall-istampa u l-Mistoqsijiet u Tweġibiet.
Tweġiba tal-Kummissjoni Ewropea
Konklużjonijiet ewlenin tal-Komunikazzjoni:
Fit-tweġiba tagħha għall-IĊE, il-Kummissjoni kkomunikat l-intenzjoni tagħha li, sa tmiem l-2023, tippreżenta proposta leġiżlattiva, biex telimina gradwalment, u finalment tipprojbixxi, l-użu tal-gaġeġ għall-annimali kollha msemmija fl-IĊE, taħt kundizzjonijiet li għandhom jiġu ddeterminati abbażi tal-opinjonijiet tal-Awtorità Ewropea dwar is-Sigurtà fl-Ikel (EFSA, European Food Safety Authority) u r-riżultati ta’ valutazzjoni tal-impatt u konsultazzjoni pubblika.
Flimkien mal-leġiżlazzjoni u biex tiġi ffaċilitata tranżizzjoni bbilanċjata u ekonomikament vijabbli għat-tmiem tat-trobbija fil-gaġeġ, il-Kummissjoni se tfittex miżuri ta’ appoġġ speċifiċi, bħall-kummerċ u r-riċerka u l-innovazzjoni. B’mod partikolari, il-Politika Agrikola Komuni l-ġdida se tipprovdi appoġġ finanzjarju u inċentivi - bħall-istrument il-ġdid tal-ekoskemi - biex tgħin lill-bdiewa jaġġornaw għal faċilitajiet li jirrispettaw aktar lill-annimali f’konformità mal-istandards il-ġodda.
Segwitu
Bħala parti mill-Istrateġija tagħha tal-2020 "Mill-Irziezet sal-Platt", il-Kummissjoni kienet diġà esprimiet l-intenzjoni tagħha li tipproponi reviżjoni tal-leġiżlazzjoni kollha tal-UE dwar il-benessri tal-annimali, inkluż dwar il-benessri fl-azjendi agrikoli. Din il-leġiżlazzjoni ġiet sottomessa għal kontroll tal-idoneità, konkluż f’Settembru 2022. Ir-riżultati tiegħu ġew ippreżentati f’Dokument ta’ Ħidma tal-Persunal tal-Kummissjoni. Ara aktar informazzjoni dwar ir-reviżjoni u l-iżviluppi relatati.
Kif imħabbar fit-tweġiba tal-2021 għall-Inizjattiva taċ-Ċittadini “End the Cage Age”, fl-2022 u fit-2023 l-EFSA ppubblikat opinjonijiet xjentifiċi dwar ir-riskji għat-trattament xieraq assoċjati mal-gaġeġ għall-ispeċijiet u l-kategoriji kollha tal-annimali koperti mill-IĊE (ħnieżer, tiġieġ tal-bajd, tiġieġ tas-simna, nissiela tas-saffi, għoġġiela, fniek, papri, wiżż u summien).
Fil-Viżjoni għall-Agrikoltura u għall-Ikel adottata fid-19 ta' Frar 2025, li tibni fuq ir-rakkomandazzjonijiet tad-Djalogu Strateġiku dwar il-Futur tal-Agrikoltura fl-UE, il-Kummissjoni ħabbret l-intenzjoni tagħha li:
- tagħmel skambji mill-qrib mal-bdiewa, il-katina alimentari u s-soċjetà ċivili,
- fuq dik il-bażi, tippreżenta proposti dwar ir-reviżjoni tal-leġiżlazzjoni eżistenti tal-UE dwar il-benessri tal-annimali, inkluż l-impenn tagħha li tneħħi l-gaġeġ gradwalment,
- bħala parti minn din ir-reviżjoni leġiżlattiva, issegwi, f'konformità mar-regoli internazzjonali, allinjament aktar b'saħħtu tal-istandards tal-benessri tal-annimali applikati għall-annimali u l-ikel importati.
Wara t-tħabbira li saret fil-Viżjoni għall-Agrikoltura u għall-Ikel tal-2025, il-Kummissjoni nediet valutazzjoni tal-impatt għal reviżjoni tal-leġiżlazzjoni tal-UE dwar il-benessri fl-azjendi agrikoli. Twettqu sejħa għal evidenza, konsultazzjoni pubblika u attivitajiet oħra ta’ konsultazzjoni.
Abbażi ta’ dawn l-attivitajiet ta’ konsultazzjoni u l-valutazzjoni tal-impatt li għaddejja bħalissa, l-Istrateġija tal-UE dwar il-Bhejjem, adottata fis-7 ta’ Lulju 2026, tiddeskrivi l-azzjonijiet li ġejjin għal settur tal-bhejjem sostenibbli, li jsegwu l-impenji li saru fit-tweġiba tal-Kummissjoni għall-inizjattiva “End the Cage Age”:
- sa tmiem l-2026, il-Kummissjoni biħsiebha tipproponi reviżjoni mmirata tar-regoli dwar il-benesseri tal-annimali għat-tiġieġ tal-bajd u għat-tiġieġ tas-simna, b’fokus fuq l-eliminazzjoni gradwali tal-gaġeġ, indikaturi prattiċi dwar il-benesseri fil-farm, it-tmiem tal-qtil sistematiku tal-flieles irġiel u rekwiżiti ekwivalenti għall-importazzjoni.
- sat-2 kwart tal-2027, il-Kummissjoni beħsiebha tipproponi reviżjoni mmirata tar-regoli dwar it-trattament xieraq tal-annimali għall-ħnieżer, inkluża t-tranżizzjoni minn kaxex għal sistemi ta’ mqawel, indikaturi prattiċi tat-trattament xieraq fl-azjendi agrikoli, u rekwiżiti ekwivalenti ta’ importazzjoni.
Għal aktar dettalji, ara l-paġna web apposta.
