An scéala is déanaí

Inniu, chláraigh an Coimisiún tionscnamh Eorpach nua ó na saoránaigh.

Iarrann eagraithe an tionscnaimh ‘Cuir Cosc ar Fhógraíocht agus Urraíocht Breoslaí Iontaise’ ar an gCoimisiún cosc a mholadh ar fhógraíocht agus urraíocht lena dtacaítear leis an margadh do bhreoslaí iontaise agus lena gcuirtear chun cinn é, sin agus maidir le gach cineál feithicle a úsáideann na breoslaí sin (lasmuigh d’fheithiclí a úsáidtear le haghaidh seirbhísí iompair lena ngabhann leas eacnamaíoch ginearálta).

Is é seo an ceathrú tionscnamh a cláraíodh in 2021.

Ina rún maidir leis an tionscnamh Eorpach ó na saoránaigh ‘Ná coinnímis ainmhithe i gcásanna feasta’, iarrann Feisirí Pharlaimint na hEorpa ar an gCoimisiún tograí reachtacha a cheapadh chun cosc a chur ar fheirmeoireacht ar ainmhithe i gcásanna san Aontas, roimh 2027 más féidir, tar éis idirthréimhse iomchuí agus tar éis dlúthmheasúnú tionchair eolaíoch a chur i gcrích.

Glacadh an rún an 10 Meitheamh le 558 vóta i bhfábhar, 37 vóta i gcoinne agus 85 staonadh ó vótáil.

Féach taifeadadh na díospóireachta sa seisiún iomlánach ar shuíomh gréasáin na Parlaiminte.

Tá an Coimisiún Eorpach ag tabhairt cuireadh do shaoránaigh eolas a chur ar an Tionscnamh Eorpach ó na Saoránaigh – agus an fócas ar Éirinn – an 16 Meitheamh, agus an 18 Meitheamh is ar Lucsamburg a dhíreofar. Chun cur le raon na n-imeachtaí agus a bhuí leis an bhformáid dhigiteach, is féidir le saoránaigh ó Bhallstáit eile freastal air freisin.

Féach ar dhátaí na n-imeachtaí atá le teacht ar ár suíomh gréasáin. Tá taifeadtaí ó na himeachtaí a bhí dírithe ar an nGearmáin , ar an Danmhairg agus ar an tSualainn ar fáil freisin.

De dheasca na ndúshlán atá cruthaithe ag paindéim COVID-19, ghlac an Coimisiún cinneadh an 3 Meitheamh síneadh trí mhí eile a chur leis na sé Thionscnamh Eorpacha ó na Saoránaigh a bhfuil ráitis tacaíochta á mbailiú acu faoi láthair. Maidir le sé thionscnamh eile a bhfuil an bailiúchán fós ar siúl ina leith, bhain siad tairbhe cheana féin as síneadh uasta iomlán de 12 mhí leis na síntí a cuireadh leis an tréimhse i mí Iúil 2020, i mí na Nollag 2020 agus i bhFeabhra na bliana seo. Thug an Coimisiún fógra d’eagraithe na dtionscnamh lena mbaineann. Léigh téacs an chinnidh cur chun feidhme ón gCoimisiún.

Beidh an deichiú heagrán de Lá an Tionscnaimh Eorpaigh ó na Saoránaigh ar siúl ar líne an 3 agus an 4 Meitheamh. Is é Coiste Eacnamaíoch agus Sóisialta na hEorpa a eagraíonn an lá i gcomhar le páirtithe leasmhara institiúideacha agus na sochaí sibhialta.

Déardaoin an 3 Meitheamh beidh lá iomlán díospóireachtaí ann maidir le hionstraim an Tionscnaimh Eorpaigh ó na Saoránaigh lena ndíreofar ar na gnéithe atá tábhachtach chun go mbeidh an Tionscnamh níos láidre agus chun treisiú a dhéanamh ar an daonlathas rannpháirtíochta ar leibhéal an Aontais.
Mar chuid den chlár freisin, reáchtálfar ceardlanna a bheidh dírithe ar eagraithe tionscnamh agus is éard a chlúdófar iontu ábhair ar nós feachtasaíocht ar líne agus tiomsú airgid.
An 4 Meitheamh tabharfar deis d’eagraithe na dtionscnamh atá ar siúl faoi láthair a dtionscnaimh a chur i láthair.
Má theastaíonn tuilleadh eolais uait faoin gclár, na haíonna agus na ceardlanna, féach leathanach gréasáin an imeachta, a dhéantar a nuashonrú go tráthrialta. Cláraigh faoin 30 Bealtaine!

An 28 Aibreán chuir an Coimisiún Eorpach tús le sraith 2021 de 10 n-imeacht ar líne maidir leis an Tionscnamh Eorpach ó na Saoránaigh le himeacht rathúil a bhí dírithe ar an nGearmáin. An 20 Bealtaine táimid ag tabhairt cuireadh do shaoránaigh na Danmhairge eolas a chur ar ionstraim uathúil seo an daonlathais rannpháirtigh agus, an 25 Bealtaine, seal na Sualainne a bheidh ann. Buailfidh tú le saoránaigh rannpháirteacha, le hionadaithe institiúidí an Aontais agus le páirtithe leasmhara a bhfuil dúspéis acu sa daonlathas rannpháirteach. Glacfaidh eagraithe reatha agus iar-eagraithe páirt freisin chun a léargas a thabhairt. 

Bí linn don seimineár gréasáin ‘TES céim ar chéim’ an 18 Bealtaine chun treoir phraiticiúil a fháil maidir leis na céimeanna den nós imeachta a bhaineann le tionscnamh Eorpach ó na saoránaigh – an obair
ullmhúcháin, an próiseas clárúcháin, sínithe a bhailiú, céim an fhíoraithe agus an tionscnamh a chur isteach ina measc. Faigh tuilleadh eolais ar leathanach gréasáin an tseimineáir gréasáin.

Inniu, chláraigh an Coimisiún dhá thionscnamh Eorpacha nua ó na saoránaigh.

Iarrann eagraithe an tionscnaimh ‘An Clár um Malartú Seirbhíseach Poiblí’ (Civil Servant Exchange Program) ar an gCoimisiún scéim a sheoladh lena gcuirfear taithí ghairmiúil ar fáil do sheirbhísigh phoiblí ó thíortha den Aontas i seirbhís chomhchosúil i mBallstát eile ar feadh tréimhse idir 2 mhí agus 12 mhí.

Iarrann eagraithe an tionscnaimh ‘Gairdíní Glasa Dín’ (Green Garden Roof Tops) ar an gCoimisiún creat a mholadh le go mbeifear in ann gairdíní glasa a chur ar dhíonta cuideachtaí.

Reáchtálfaidh Parlaimint na hEorpa éisteacht phoiblí maidir leis an séú Tionscnamh Eorpach ó na Saoránaigh ar éirigh leis, is é sin ‘Ná coinnímis ainmhithe i gcásanna feasta’, an 15 Aibreán ó 9.00 go 12.00. I ngeall ar shrianta COVID-19 atá ann faoi láthair, reáchtálfar an cruinniú ó chian le láithreacht fhisiceach theoranta sa seomra, ach déanfar é a shruthú ina iomláine ar líne don phobal.

Freastail ar an seimineár gréasáin a bheidh ar siúl an 30 Márta 2021 chun treoir phraiticiúil a fháil maidir leis an dóigh le ráitis tacaíochta a bhailiú go rathúil do thionscnamh Eorpach ó na saoránaigh.