An chaoi a n‑oibríonn sé

Sula seolann tú tionscnamh, is fiú smaoineamh ar chuid de na gnéithe praiticiúla, mar shampla:

• Reachtaíocht de chuid an Aontais a rith, an é sin an bealach is fearr le do spriocanna a bhaint amach?
• Ar dtús, caithfidh tú grúpa d’eagraithe a bhunú ina mbeidh ar a laghad seachtar saoránach den Aontas a bhfuil cónaí orthu i 7 mBallstát éagsúla. Chun é sin a dhéanamh, ní mór duit daoine a bhailiú le chéile ó thíortha éagsúla san Aontas atá toilteanach tacú le do chúis.
• Cén dóigh a n-eagróidh tú d’fheachtas chun na sínithe a bhailiú?

Tá comhairle mhionsonraithe maidir leis na pointí sin ar fad ar fáil ar Fhóram an Tionscnaimh Eorpaigh ó na Saoránaigh

Sula bhféadfaidh tú tosú ar shínithe a bhailiú do do thionscnamh, ní mór duit iarraidh ar an gCoimisiún é a chlárú.

Chun é sin a dhéanamh, seo thíos a bheidh ort a dhéanamh:

• Cuntas d’eagraithe a chruthú. Beidh sé seo in úsáid agat le do thionscnamh a bhainistiú agus chun dul i dteagmháil leis an gCoimisiún a fhad agus a bheidh an tionscnamh idir lámha agat.
• Cur síos a dhéanamh ar do thionscnamh i gceann de theangacha oifigiúla an Aontais Eorpaigh (chomh maith le sonraí agus doiciméid ábhartha maidir leis an ngrúpa d’eagraithe, maoiniú a fuarthas, etc.)

Níl ceangal ar an gCoimisiún gach tionscnamh a chlárú. Ní chláraíonn sé ach na tionscnaimh a chomhlíonann critéir áirithe.
A luaithe a iarrfaidh tú go gclárófar do thionscnamh, déanfaidh an Coimisiún a mheas cé acu a ghlacfaidh nó nach nglacfaidh sé leis.
Gheobhaidh tú freagra laistigh de 2 mhí (nó, i gcásanna áirithe, laistigh de 4 mhí).
Má chinneann an Coimisiún do thionscnamh a chlárú, foilseofar anseo é.

Ní mór duit tacaíocht a fháil ó 1 mhilliún saoránach den Aontas ar a laghad
, agus tairseacha (líon íosta) ann i 7 mBallstát ar a laghad.
Ní mór do na daoine sin foirm ráitis tacaíochta shonrach a líonadh isteach.

Féadfaidh tú sínithe a bhailiú ar na dóigheanna seo a leanas:

• ar pháipéar (foirmeacha réamhlíonta, atá ar fáil le híoslódáil ó do chuntas d’eagraithe)
• ar líne (trí úsáid a bhaint as an Lárchóras Bailithe ar Líne).

Tá na foirmeacha seo ar fáil i dteangacha oifigiúla uile an Aontais Eorpaigh. Le linn an bhailithe, ní mór duit cloí leis na rialacha maidir le cosaint sonraí.

Uainiú

Nuair atá tú réidh chun d’fheachtas a sheoladh, ní mór duit an dáta tosaithe a phiocadh(ar a dhéanaí 6 mhí tar éis duit do thionscnamh a chlárú) agus ní mór duit an Coimisiún a chur ar an eolas 10 lá oibre ar a laghad roimhe.
Beidh 12 mhí agat ansin chun ráitis tacaíochta a bhailiú.

Cé atá in ann síniú?

Chun síniú a dhéanamh, ní mór don dhuine a bheith:

• ina saoránach den Aontas Eorpach (náisiúnach de Bhallstát den Aontas)
• sean go leor le vóta a chaitheamh i dtoghcháin Eorpacha, sin nó 16 bliana d’aois i dtíortha áirithe

LEID – Is fearr níos mó sínithe ná mar atá ag teastáil a bhailiú. Uaireanta, d’fhéadfadh sé nach mbeadh na húdaráis náisiúnta in ann na ráitis tacaíochta uile a chuireann tú ar fáil a dheimhniú.

Tuilleadh eolais maidir le sínithe a bhailiú

Má éiríonn leat go leor sínithe a bhailiú laistigh den tréimhse 12 mhí, déan iad a ghrúpáil de réir náisiúntachta agus iad a sheoladh chuig na húdaráis fhreagracha i ngach Ballstát iad lena bhfíorú.

Tá suas le 3 mhí agat chun é sin a dhéanamh ó dháta deiridh do thréimhse bailiúcháin.

Beidh 3 mhí eile ag na húdaráis ansin chun a fhíorú líon na ráiteas tacaíochta atá bailí (eiseoidh siad deimhniú duit ina leith sin).

LEID – Cuireann an Coimisiún seirbhís shlán malartaithe comhad ar fáil chun na ráitis tacaíochta (a bhailítear ar pháipéar) a aistriú chuig na húdaráis náisiúnta. Is é an Coimisiún a thugann aire don aistriú sin.

Tuilleadh eolais maidir le ráitis tacaíochta a fhíorú.

Nuair a bheidh an deimhniú deiridh faighte agat ó na húdaráis náisiúnta, beidh 3 mhí agat chun do thionscnamh a chur faoi bhráid an Choimisiúin – mar aon leis an eolas faoin tacaíocht agus faoin maoiniú a fuair tú don tionscnamh.

Tuilleadh eolais maidir leis an tionscnamh a chur isteach.

Nuair a bheidh do thionscnamh curtha isteach agat, tosóidh an measúnú ar do thionscnamh:

• Laistigh de mhí amháin
  Buailfidh tú le hionadaithe ón gCoimisiún ionas go bhféadfaidh tú na saincheisteanna a ardaíodh i do thionscnamh a mhíniú go mion.
   
• Laistigh de 3 mhí
  Beidh an deis agat do thionscnamh a chur i láthair le linn éisteacht phoiblí i bParlaimint na hEorpa. D’fhéadfadh an Pharlaimint díospóireacht a dhéanamh ag seisiún iomlánach, agus d’fhéadfadh sé go nglacfadh sí rún a bhaineann le do shaincheist mar thoradh air sin.
   
• Laistigh de 6 mhí
  Léireoidh an Coimisiún go soiléir cén ghníomhaíocht a mholfaidh sé mar fhreagra ar do thionscnamh (má tá aon mholadh aige), agus na cúiseanna atá aige le beart a dhéanamh (nó gan beart a dhéanamh). Is i bhfoirm teachtaireachta a bheidh an freagra sin, rud a ghlacfaidh Coláiste na gCoimisinéirí go foirmiúil agus déanfar é a fhoilsiú i dteangacha oifigiúla uile an Aontais Eorpaigh. Buailfidh tú le hionadaithe an Choimisiúin a thabharfaidh míniú níos mionsonraithe ar a chinneadh maidir le do thionscnamh.

Tuilleadh eolais maidir le freagra a fháil ón gCoimisiún.

Reachtaíocht

Má mheasann an Coimisiún gur iomchuí reachtaíocht a rith mar fhreagra ar do thionscnamh, tosóidh sé ar thogra foirmiúil a ullmhú. D’fhéadfadh céimeanna ullmhúcháin a bheith ag teastáil chuige sin, cuir i gcás comhairliúcháin phoiblí, measúnuithe tionchair, etc. Nuair a ghlacfaidh an Coimisiún an togra, cuirfear faoi bhráid Pharlaimint na hEorpa agus na Comhairle é (nó faoi bhráid na Comhairle amháin i gcásanna áirithe), agus beidh orthu siúd an é a ghlacadh chun dlí a dhéanamh de.

Gníomhaíocht eile

Níl ceangal ar an gCoimisiún reachtaíocht a mholadh. Fiú i gcás freagraí dearfacha ar thionscnaimh, d’fhéadfadh sé gur obair leantach neamhreachtúil an obair leantach is iomchuí ar thionscnamh. Tá réimse bearta eile ann a d’fhéadfadh a bheith níos oiriúnaí.

Gníomhaíocht leantach

Féadfaidh Parlaimint na hEorpa measúnú a dhéanamh ar na bearta atá glactha ag an gCoimisiún freisin.