Tíolacadh agus scrúdú
Cuireadh an tionscnamh dar teideal ‘Beartas comhtháthaithe maidir le comhionannas na réigiún agus inbhuanaitheacht na gcultúr réigiúnach’ faoi bhráid an Choimisiúin Eorpaigh an 4 Márta 2025, tar éis dó 1,269,351 ráiteas tacaíochta fíoraithe a bhailiú. Féach Nuacht ón gCoimisiún Eorpach
An 25 Márta 2025 tugadh an deis d’eagraithe an tionscnaimh cuspóirí a dtionscnaimh a chur i láthair ag an gcruinniú leis an Leas-Uachtarán Feidhmiúcháin, Raffaele Fitto, agus le hoifigigh an Choimisiúin Eorpaigh i gcomhréir le hAirteagal 15 den Rialachán maidir leis an Tionscnamh Eorpach ó na Saoránaigh. Féach na grianghraif.
Cuireadh an tionscnamh seo i láthair mar chuid d’éisteacht phoiblí i bParlaimint na hEorpa an 25 Meitheamh 2025. Chuir na heagraithe sonraí ar fáil faoina gcuspóirí agus bhí malartú tuairimí ann idir Feisirí Pharlaimint na hEorpa maidir leis an tionscnamh seo. Féach ar an taifeadadh.
Reáchtáladh díospóireacht ar an tionscnamh seo ag seisiún iomlánach Pharlaimint na hEorpa an 10 Iúil 2025. Féach an taifeadadh físe.
Ghlac an Coimisiún teachtaireacht an 3 Meán Fómhair 2025 inar leagadh amach a fhreagra ar an tionscnamh. Féach Nuacht ón gCoimisiún.
- български
- Español
- čeština
- dansk
- Deutsch
- eesti
- ελληνικά
- English
- français
- hrvatski
- italiano
- latviešu
- lietuvių
- magyar
- Malti
- Nederlands
- polski
- português
- română
- slovenčina
- slovenščina
- suomi
- svenska
Freagra an Choimisiúin Eorpaigh
Príomhchonclúidí na Teachtaireachta
Rinne an Coimisiún anailís chúramach ar na tograí ó na saoránaigh agus tháinig sé ar an gconclúid, cé nach dtagann roinnt tograí faoi inniúlacht an Aontais, toisc go gcuirfidís isteach ar leagan amach bunreachtúil reatha na mBallstát lena mbaineann, go bhfuil cuid eile cumhdaithe cheana féin faoin mbeartas Comhtháthaithe atá ann faoi láthair a bhuí lena choimircí láidre lena gcuirtear cuimsiú agus cóir chomhionann mionlach chun cinn, chomh maith le hurraim don éagsúlacht chultúrtha agus teanga.
Dá bhrí sin, ní mholfar aon reachtaíocht nua mar fhreagairt ar an tionscnamh Eorpach ó na saoránaigh seo. Mar sin féin, leanfaidh an Coimisiún de rochtain neamh-idirdhealaitheach ar mhaoiniú ón Aontas a chinntiú agus d’fhaireachán agus de thacaíocht a thabhairt do ghníomhaíochtaí na mBallstát chun cóir chomhionann a ráthú i gcur chun feidhme an Bheartais Chomhtháthaithe.
Maidir leis an gcéad Chreat Airgeadais Ilbhliantúil eile, tá beartas comhtháthaithe agus fáis neartaithe nuachóirithe molta ag an gCoimisiún lena gcinntítear go bhfuil sásraí leordhóthanacha i bhfeidhm sna Ballstáit chun comhlíonadh fhorálacha ábhartha na Cairte um Chearta Bunúsacha a chinntiú le linn chur chun feidhme na bpleananna comhpháirtíochta náisiúnta agus réigiúnaí, chomh maith le hurraim do phrionsabail an smachta reachta. I gcás nach gcomhlíonann Ballstát na coinníollacha sin, coinneoidh an Coimisiún na híocaíochtaí comhfhreagracha siar.
