Tíolacadh agus scrúdú
Cuireadh an tionscnamh ‘Mo ghuth, mo rogha: Ar mhaithe le ginmhilleadh sábháilte inrochtana’ faoi bhráid an Choimisiúin Eorpaigh an 1 Meán Fómhair 2025 tar éis dó 1,124,513 ráiteas tacaíochta bhailí a fháil. Féach Nuacht ón gCoimisiún Eorpach.
An 01 Deireadh Fómhair 2025 chuir eagraithe an tionscnaimh cuspóirí a dtionscnaimh i láthair i gcruinniú leis an gCoimisinéir Lahbib agus le hoifigigh an Choimisiúin Eorpaigh i gcomhréir le hAirteagal 15 den Rialachán maidir leis an Tionscnamh Eorpach ó na Saoránaigh. Féach na grianghraif.
Cuireadh an tionscnamh seo i láthair mar chuid d’éisteacht phoiblí i bParlaimint na hEorpa an 2 Nollaig 2025. Tugadh cuireadh do na heagraithe sonraí a chur ar fáil faoina gcuspóirí. Bhí malartú tuairimí ag Feisirí Pharlaimint na hEorpa maidir leis an tionscnamh seo. Féach leathanach na héisteachta poiblí.
Pléadh an tionscnamh ag seisiún iomlánach Pharlaimint na hEorpa an 16 Nollaig 2025. Sa rún a glacadh an 17 Nollaig 2025, chuir Parlaimint na hEorpa tacaíocht in iúl don tionscnamh. Féach an phreaseisiúint ó Pharlaimint na hEorpa.
Féach na chéad chéimeanna eile: Céim ar Chéim
Freagra an Choimisiúin Eorpaigh
Príomhchonclúidí na Teachtaireachta.
Tar éis dó anailís chúramach a dhéanamh ar an tionscnamh agus maidir le teorainneacha Chonarthaí an Aontais ar inniúlacht an Aontais i réimse na sláinte poiblí, cuireann an Coimisiún i bhfios go láidir gur féidir leis na Ballstáit brath ar ionstraimí an Aontais atá ann cheana chun feabhas a chur ar rochtain chomhionann ar sheirbhísí cúraim sláinte atá ar fáil go dleathach agus atá inacmhainne, seirbhísí ginmhillte sábháilte ina measc.
Is féidir an tacaíocht sin ón Aontas a chur ar fáil trí chlár Chiste Sóisialta na hEorpa Plus (CSE+), i gcás inar mian leis na Ballstáit, go deonach agus i gcomhréir lena ndlíthe náisiúnta, tacaíocht den sórt sin a sholáthar, go háirithe trí úsáid a bhaint as na hacmhainní atá ar fáil faoina gcláir CSE+ nó trí na hacmhainní sin a ath-leithdháileadh. D’fhéadfaí CSE+ a úsáid chun feabhas a chur ar an rochtain ar sheirbhísí ginmhillte inacmhainne sábháilte atá ar fáil go dlíthiúil do mhná torracha. Is féidir le CSE+ tacú le hiarrachtaí na mBallstát sin, agus neamhspleáchas á thabhairt dóibh ag an am céanna chun a chinneadh conas a sholáthrófar rochtain ar ghinmhilleadh sábháilte agus dlíthiúil agus cé na coinníollacha faoina soláthrófar í.
Ós rud é gur féidir leis na Ballstáit atá toilteanach tacaíocht ón Aontas a chur ar fáil go measartha tapa cheana féin faoi na hionstraimí atá ann cheana, ní gá ionstraim dlí nua a mholadh.
